احمد ابوسنة

اخي الكريم ابو زياد .
اسف على تأخير الرد فسامحنا

قبل ان اجيبك على المعالجة المحاسبية للنشاط المذكور .

يجب ان نتفق على بعض النقاط بخصوص توجيهك للقيود المحاسبية وتسمية الحسابات عندك

اولاً : نشاط منشأتك هو نشاط لنقل بضاعة لمصلحة عميل مقابل اجر مادي صح الكلام ؟

اذن خدمة النقل التى تقدمها منشأتك هى ايراد البيع ( المبيعات )اتفقنا ؟

طيب بما ان خدمة النقل اللى هى المبيعات لا تتحق الا بوجود سيارات اذن السيارات نفسها فى هذه الحالة واى مصروف عليها يدخل تحت بند ( المشتريات ) تمام ياعمنا ؟؟؟


الشركة اللى انت شغال فيها راحت تعاقدت مع شركة الايمان عشان تاخد منها سيارات تشغلها لحسابها
مقابل نسبة هتاخدها شركة الايمان دي . وايضا تم الاتفاق فيما بينكم على ان تسدد شركة الايمان مصاريف سياراتها . مظبوط كده ؟؟؟

معلش انا بكرر علشان لو فاهم حاجة غلط . تظهر وتبان

طيب اذن شركة الايمان دى تعتبر ايه ياعمنا ؟؟؟؟
هقولك ... فيما يلي جميع الحالات والاحداث التى تحدث من شركة الايمان بص معايا كده ياعمنا



شركة الايمان اذا انفق على سياراتها يسجل فى دفاتر منشأتك قيود نفقات على المشتريات وليس مصروفات عمومية علشان احنا اتفقنا فوق ان اى مصروف على العربيات عندك هيكون نفقات تحمل على ح المشتريات .. ومش مصروفات .

شركة الايمان اذا سددت مصاريف خاصة بسياراتها فهي بذلك تعتبر ذمة دائنة

شركة الايمان اذا اخذت نسبتها المقررة اذن هذا ايضا يعتبر نفقات على المشتريات
لأن شركة الايمان فى تلك الحالة . تعتبر مورد جابلنا البضاعة اللى حققنا بيها الايراد


واضح كده ياعمنا . علشان لو مش واضح القيود مش هيكون ليها لازمة

طيب نشوف الاحداث اللى هتحصل عندك وقيدها يكون ازاى فى كل مرة

اول حدث
ــــــــــــــــــــــــــــــــــــــــــــــــــ ــــــــــــــــــــــ

التعاقد مع العميل واستلام مبلغ التعاقد منه ودي سهلة طبعا يااستاذنا
هنقول

250000من ح / البنك

250000الى ح / العميل

ــــــــــــــــــــــــــــــــــــــــ

القيد التاني لما تدفع شركة الايمان مصروفات خاصة بسيارتها ليك انت

30000 من ح / البنك
30000 الى ح / الذمم الدائنة ( شركة الايمان )

ــــــــــــــــــــــــــــــــــــــــــــــــــ ــــــــــــــــــــ

القيد التالت لما الفورمان اللى عندك ياخد عهدة

50000 من ح / عهدة مالية الفورمان

50000 الى ح / البنك

ـــــــــــــــــــــــــــــــــــــــــــــ

القيد الرابع ياعمنا لما الفورمان يصرف بقى
وهنا لازم نعمل حسابين حسب رؤيتي الخاصة
والحسابين تابعين لمشتريات
حساب اسمه نفقات سيارات الشركة
وحساب اسمه نفقات سيارات شركة الايمان بخصوص عقد ( ونكتب اسم التعاقد او العميل )

تمام ياعمنا الكلام ده بقى مهم جدا دلوقتي

يبقى القيد هيكون ازاى .

من مذكورين

20000ح / نفقات خاصة بسيارات شركتك انت
30000ح / نفقات سيارات شركة الايمان
50000 الي ح / عهدة مالية الفورمان

ــــــــــــــــــــــــــــــــــــــــــــــــــ ـــــــ


طيب ياعمنا لسه فى عندنا كده حساب فى الذمم الدائنة لسه دائن بقيمة ال 30000 ريال بتوع شركة الايمان وطبعا هتسأل احنا هنعمله زمة دائنة ليه
عشان يامعلم لو السنة انتهت وانت لسه ماخلصتش تعاقدك . يبقى في عندك 30000 ريال يرحلوا للسنة اللى بعدها

ولكن بفرض ان العملية انتهت والتعاقد انتهي
هنقفل بقى ونقول

30000من ح / الذمم الدائنة ( شركة الايمان )

30000 الى ح نفقات سيارات ( شركة الايمان )

ــــــــــــــــــــــــــــــــــــــــــــــــــ ـــــــــ

اخر قيد يااستاذنا هو قيد تسجيل سداد نسبة شركة الايمان فى التعاقد ده .

وفى الحالة دى برضه هنقول انه سوف يتم تحميل تلك النسبة على ح المشتريات فى حساب يحمل اسم شركة الايمان ...

ويكون القيد

100000 من ح / عمولة توريد سيارات ( شركة الايمان )


100000الى / البنك

ـــــــــــــــــــــــــــــــــــــ

لو عملت حسابات استاذ للحسابات المذكورة فى القيود اللى فوق دي كلها
هتلاقي ان ح نفقات سيارات شركة الايمان هيكون صفر
وده يامعلم علشان هى اللى دفعت مصاريفها .
بالاضافة الى ان كل المعلومات والبيانات هتلاقيها عندك . فى اى وقت وممكن ترجلعلها . طبعا
اتمنى ان تكون المعالجة صح وبالتوفيق ان شاء الله


اخوك

احمد ابوسنة

محاسب معتمد

تحليل رائع يا استاذ أحمد ابو سنه


بس انا لسه حاسس انه العمليه تايهه منى هنسخ الحاجات دي واراجعها واششوف لو قدرت افهم
والله المستعان


وجزاك الله كل الخير

ابوزياد

أنا عاجز عن الشكر والله ياأستاذ أحمد ألف ألف شكر
هو الموضوع غير متعلق بالمبيعات خالص
بس حضرتك وضحت اللي أنا عاوزه في القيد الرابع
جزاك الله خيرا كثيرا